೬೫ ನೇ ಸ್ವಾತಂತ್ರ್ಯೋತ್ಸವದ ಶುಭಾಶಯಗಳು

೬೫ ನೇ ಸ್ವಾತಂತ್ರ್ಯೋತ್ಸವದ ಶುಭಾಶಯಗಳು

ನಾವಾಗಿದ್ದೆವು ದಾಸರು ಬ್ರಿಟೀಷರಿಗೆ
ದಶಕ ನಲವತ್ತರ ಪೂರ್ವದಲಿ
ಆಳಿದರು ಅನುಕಂಪವಿಲ್ಲದೆ ಮೃಗದಂತೆ
ಅಳಿಸಿದರು ಸಹಸ್ರರನು ತೋಪಿನಂಕುಶದೆ

ಪಣತೊಟ್ಟರು ಪೂರ್ವಜರು ಪಡೆವೆವೆಂದು
ವಿಮುಕ್ತಿಯ ದಾಸ್ಯದಿಂದ ಒಡ್ಡಿದರೆದೆಯಂದು
ಗುಂಡಿನ ಕಾಳಗದಿ ,ಶಾಂತಿಮಂತ್ರವ ಪಟಿಸುತಾ
ಸೋತರಂದು ಬ್ರಿಟಿಶರು ಒಪ್ಪಿಸುತ ಭಾರತವ

ಕಳೆದಿಹೆವು ಆರುದಶಕಗಳ ಸ್ವಾತಂತ್ರದಲಿ
ಅತಂತ್ರರಾಗಿಹೆವು ಅರಿಯದೆ ನಾವೆಲ್ಲಾ ಒಂದೇ
ಕಾದಾಡುತ  ಸೆಣೆಸಾಡುತ ಭೂಮಿ,ನೀರಿಗಾಗಿ
ಪದವಿ ,ಕುರ್ಚಿಗಾಗಿ ಮರೆಯುತ ದೇಶ ಹಿತವ

ಆಗಬೇಕಿದೆ ಭಾರತ ವಿಶ್ವದ ಅಗ್ರಮಾನ್ಯ
ಕಲೆತು ಶ್ರಮಿಸೋಣ ವಿಜ್ಞಾನಿಗಳು ಸುಜ್ಞಾನಿಗಳು
ಬೇಡ ಪರದೇಶ ಮೋಹ, ಬೆಳೆಸೋಣ  ದೇಶ,
ಮುನ್ನಡೆಸೋಣ ವಿಜ್ಞಾನ, ವೈದ್ಯ, ತಾಂತ್ರಿಕತೆಯಲಿ

ವ್ಯಯಿಸೋಣ ಸಂಪತ್ತನು ದೇಶದೊಳಿತಿಗಾಗಿ
ಬೇಡ ಸ್ವಾರ್ಥಕ್ಕಾಗಿ ಕುಟುಂಬ ಪೋಷಣೆಗಾಗಿ
ಹರಿಸೋಣ ಪರಿಶ್ರಮ ಮನಸುಗಳನು
ಉಳಿಸಿ ಬೆಳೆಸೋಣ ಸುಧೃಡ ಭಾರತವ

ಹಾರಾಡಲಿ ಭಾರತ ಧ್ವಜ ವಿಶ್ವದೆಲ್ಲೆಡೆ
ಗೌರವಿಸುವಂತಾಗಲಿ ಭಾರತವನ್ನೆಲೆಡೆ
ಭಾರತೀಯರು ಪುರಸ್ಕೃತರಾಗಲಿ ವಿಶ್ವದಲಿ
ಜಯಹೇ ಜಯಹೇ ಜಯ ಜಯ ಭಾರತಮಾತೆ

ರಚನೆ: ಕೆ.ವಿ.ಶ್ರೀನಿವಾಸ ಪ್ರಸಾದ್
ನಂ-೧ ಏ ಡೀ ಎನ್ಕ್ಲೇವ್ ,ಮಾರುತಿನಗರ
ಸಹಕಾರನಗರ ಅಂಚೆ, ಬೆಂಗಳೂರು-೯೨
ಫೋನ್ ;9844276216